شيزوفرينيا…
..............…….
لا هِيَّا هيلين
ولا طرواده ف القصه
ف ليه دايمًا عِينيك بصَّه
على الأوهام؟!
وليه بتنام ..
وتتداري في حلم عبيط
تغازل طيف ماهوش موجود
وترسم للخيال ملكوت
وألف حكايه وحكايه
شريط بيمُر قدامك
صور باهته
لا مسموعه ولا صامته
يادوب تشويش
وسايب نظرتك بشويش
بتتسنِّد على المشاوير
وتنسج م الخيال روايات
تعيش فيها كما الواقع
ياراجع من خيال هربان
مافيش أبطال بدون بطولات
وإنت بتدخل الجولات
وراكب فوق حصان أعمى
لا شايف ياخد الخطوه
ولا حتى اللجام فى إيديك
وليه بعينيك ..
بتجري لآخر المشوار
وترفع كاس؟
وليه بتلوم عيون الناس
فى يوم ما بتلمح الشفقه
بيرموها عليك أوجاع
وليه حاسس زمانك ضاع
ما دام من أول القصه
بتتدارى في حلم عبيط
وترسم للخيال ملكوت
وتهرب حتى من ذاتك
وعايش حيره فُوق حيره
كأن الحيره لزْماتك
وكل اللي اترسم زادك
(شيزوفرينيا)
.......................
فاطمة المرسي
