قصيدة/أيام زمان...الشاعر/ محمود صلاح السيد...المحررة ياسمين شام/ تحياتي.

(((أيام زمان )))
لمبة جاز نمره عشره
بشريط وطربوش
وأزازه متلمعه وصافيه
نورها يضوى فى  العتمه
وباجور بحماله خمس شرايط
وناره كافيه تسوى الأكل وباالصحه والعافيه
 أو سريع وشاش وميزاته فى الأبره نحاس
 وبيعشق الأنفاس علشان الكباس
وزير الميه معمول من طين بلدنا
يسقع الميه ولاأحلى كولدير
مربوط فيه كوز  بحبل
تملا وتطفى عطشك
وتقول الحمدالله على النعمه
وبستله بحنفيه نحاس
لغسيل الوش والراس  
وطشت وأبريق نحاس
ودا كان العزال التمام أيام زمان
كانت الحياه بسيطه وسهله
والناس كانت بتحس عندها دم وأحساس
والبيت دور أرضى ومقاعد فى الدور التانى
 مسقف بعروق الخشب والقش
 ودا كان بيت العيله
ومقشة بلح من النخله
تقش البيت والشارع كام قشه
ومطر مبنى من الطين
 لتخزين   الغله والدره يحافظ عليها سنين
وفرن بلدي مبني من الطين
 علشان الخبيز والفطير والعيش الفلاحي الجميل
وجانبه الكانون
وزلعة مش علشان الجبنه  الحدقه
ولوالعمليه مزهزهه وريقة تبقى نمليه نحط فيها السمنه الفلاحى وكام طبق تبقى الحاله عال وميه الميه
ورديوا بحجاره لسماع القرآن والآذن بصوت رفعت ساعة الفطار
وفى المناسبات موعدنا مع سهره  تمام مع أم كلثوم وعبدالوهاب وعبدالحليم
والقعده قدام الدار على المصطبه
المبنيه من الطين
ولوجانا ضيف عزيز  نقعده فى المندره
أه يازمن أتشقلب حاله
كانت ناس بسيطه وعيشه سكره
بقلمى/محمودصلاح السيد 13/5/2017