قصيدة الغزال ( ترنيمة )....... بقلم/ .يزيد علوي اسماعيلي

قصيدة الغزال ( ترنيمة )
يا السَّاكن بْلا مْسَاكَن ... بِين الواد ؤ لَجْبَال
عْطاك الله ؤ زادِك.... مْن الجمال يا لُغْزال

بْغِيت نَشعر ؤ نَمْدح ... مَا وْجَدْت كْلام يَتْقال
حِيت غالي بِزِينك ... و اللِّي بْحَالك قْلال
راه بْغيتك ف صحبة... و نكملوها بالحلال
يكفينا من غربة... رَاني طالب لُوْصال
يا الساكن بلا مساكن .... بين الواد ؤ لجبال
عطاك الله و زادك ... من الجمال يا لغزال
مَا نقدر نْعدِّي و نْزِيد ... بْلا ما نْشوف خْيَالك
يا الواخد من زِين الرِّيم...زاد النخوة فْ دْلالك
نْحبك نْقولها و نْعيد ... كلمة، حْطِّيها فْ بَالَك
غزالة و عطرك نْسِيم ... ؤ رْزِينة بْافْعِالَك
يا الساكن بْلا مْساكن ... بِين الواد و لَجْبالة
عطاك الله و زادك ... من الجمال يا لُغزال
ارام ، خولة ، ريلام.... شدون ،عزة و غزال
مها ، هزراف و عنود ... كثرت فيك الاقوال
مُنايا نُسكن فْ قلبك... يكفيني من ترحال
راه العيشة من غيرك... نَحْلف لِك راها مُحال
يا الساكن بْلا مْساكَن ...بِين الواد ؤ لجْبال
عطاك الله ؤ زادك... من الجمال يا لُغزال
حبك يا غزالي ... يتضربو به الامثال
نموت ؤ نمشي بْحالي ..نْخَلِّيه قصة لِجْيال
هذه حكايتي يا لَخْوَان ... نْغَنِّيها بْالْمُوَّال
كل حرف تْحَط فْ مْكانو...ؤ عْبَارُو بْالْمَثْقال
يا الساكن بْلا مْساكن ...بِين الواد ؤ لَجْبال
عطاك الله و زادك ... من الجمال يا لُغْزال
للمعلومة
( ريم ،أرام ، خولة، ريلام، شدون، عزة، مها، هزراف، عنود ، )
هي اسماء من اسماء الغزال
يزيد علوي اسماعيلي

LikeShow more reac