★★★ الدرهم يعوم ★★★
شيء يْحَيَّر و خْبَار ما مفهوم !
فين الفرق بين البارح و اليوم؟
من زمان ( فاهم ) لا حال يدوم
و ما نْوِيت الفلس يصبح مكلوم
سْأَلْتَك يا دَرهَم : مَالَك مهموم ؟
تفكر و تخمم و حالك مشؤوم
قلتي : راه هْلِي دفعوني نْعُوم
و أرضنا صقيع و سمانا غيوم
واش غَا نَطْلع وْ لا نَفْقَد السُّوم ؟
واش غا نْتْزاد و لا نَخْسَر سْهُوم ؟
خايف على نفسي نْكون مظلوم
ف غياب تجارة او بصناعة مدعوم
شْكُون نْلُوم و مستقبلي ما معلوم؟
كيف نْقُوم و الامر صبح محسوم؟
ما عندي تجريبة ما عندي ديبلوم !!
كل ما نملك هو فدان من بصل و ثوم
وْ سُوم حْواضي باين سَعْرو معلوم
راه سوق الخضرة ف العالم مهزوم
راني نْشوف البُوم على لْوَاني يْحوم
و سْمُوم البُوم مَعْلوم لَعْمُوم القُوم .
استغربت من كلامو و بْقِيت مصدوم
و خَلِّيت خوفي ف صدري مكتوم
بَعْد ما عَوَّمْتُوه ف بحر الخصوم
يلا فزگ يَبْسُوه ف خرطوم الشوم
مَشْمُوم مْحَزًم بْشوك طِيبُو مَسْموم
و محكوم مصير من جهل سر العلوم
معدوم و مهدوم و ساسو مقسوم
ملجوم و مهزوم من طريقو ما مرسوم
نْطَلْبو من الله تعالى الحي القيوم
ما نَقْراوْ على دَرْهَمْنا صلاة المرحوم
يزيد علوي اسماعيلي
ليست هناك تعليقات:
إرسال تعليق