مجلة شعراء موسبقى الشعر العربي الشاعر القدير سليمان دغش ..قصيدة سهران الليل/ المحررة شروق تحيااااااااتي

سهـــــران الليــــــــــل / سليمان دغش

فَوءْ جفوني النعسانةْ سهران الليلْ
يئِلّي نامي ولا تنامي لَلَيْلي يطولْ
ويِغفى بِكِحلْ عيونكْ ما يعود يفِلْ
وما عندي غَير العَتمةْ لَطَفّي الشَّمس
وحدا شمسِك يا ويلي بتشرءْ بالليلْ
بردانهْ متلْ فْراشةْ ترَفرِف لَتّطيرْ
صَوبْ نجوم السَّهرانهْ عَ كِتْف الليلْ
وحَبيبي سراجهْ طافي وألبو دافي
يِمكنّو صاحي والّا غافي عَ حِلْم صغيرْ
ووحدي عَ بَرد فراشي بنطُرْ لَيطلْ
متلْ الوردهْ الدّبلانهْ عَ مخَدّةْ حَريرْ

طالْ الليلْ ونَجماتهْ مرايا دموعي
كِلْ ما نِزلِتلي دَمعَهْ توئِدْ بئلبي شَمعهْ
وبَينْ الصّحوهْ والغَفوِهْ يزيدْ ولوعي
والليلْ بطولو مش بيئولو رفيقْ العشّاءْ
دَخلَك يا لَيلْ افرِئني ولا تِترِكني بنار الأشواءْ
متل فراشةْ محمومةْ عَ هداب الضّيْ
بدها تطير ويا ويلي ما فيَّا تطيرْ
طَوَّلْ عَ جفوني طَوَّل سَهراتهْ الليلْ
وألبي يحرءْ شَمعاتهْ عَ دَمعاتُهْ
حتّى وِصلِتْ آهاتو لَنَجمْ سهَيْلْ
وحبيبي سراجو طافي وألبو دافي
وتارك روحي عريانةْ وألبي حافي
وعلى شفافي من بعدو دبل الجوري
وما عادْ يفتّحْ فيهنْ وردْ ولا فلْ
ولا عاد ينَئوِدْ لوز كتافي هاك الدوري
ليصَحّيني عَ بَوْسه تملا كاسي
من نبيد الصّبحْ الصافي معَتَّقْ بالليلْ
وحبيبي بليل الغربة سراجه طافي
يمكنّو صاحي يمكن غافي
ووحدي عَ برد فراشي متلْ فْراشة
بدا تطير ويا ويلي ما فيّا تطير
وطَوَّل عَ جفوني طَوَّل سهرانْ الليلْ

سليمان دغش