مجلة شعراء موسيقى الشعر العربي.. الشاعر الكبير سيد صادق ..قصيدة عادي لو ماتو الغلابه… المحررة الشاعرة ميسم بارودي/ تحياتي

عادي .. لو ماتوا الغلابه
عادي لو نسأل سنين ..
احنا رايحين بس فين... ؟
وهي واحده اﻻجابه ..
تفرق ف ايه ..؟!!
وشاغل بالك انت ليه ..؟!
اكلك .. بتاكله .
ومتبطرتش يوم عليه ..
اطلع ﻻبوك .. ما انت شكله.
عاش مغمض ف عينيه ..
اياك تقول أنك جعان ...
ولا كمان عايش مهان ..
العدل ايوه له ميزان ...
و الميزان بكفتين
واحنا اللي ف ايدينا الهموم ..
ف أي ساعه ف أي يوم
ندي حبة و ندي كوم ..
ولو مش عاجبك ب الكومين
احنا اللي ف ايدينا الالام ...
احنا اللي بنبيع الكلام ...
و انت اخرك ف المنام ..
حلم و تبت عليه ..
تفرق ف ايه ...؟!!
وشاغل بالك انت ليه ..؟!
اكلك .. بتاكله .
ومتبطرتش يوم عليه ..
اطلع ﻻبوك .. ما انت شكله.
عاش مغمض ف عنيه ..

سيد صادق