الشاعر القدير زغلول الطواب ..قصيدة بعنوان في ليلة الخميس ..المحررة ليمار كيلاني

في ليلة الخميس
محاظيظ ومتاعيس
المحظوظ بيطلع لسانه
والمتعوس بيجز على نيبانه
والليله كده كده بتعدى
إما وردي أو شوك بيدمى
المهم الأيام تعدى
بحلوها ومرها ما بتهدى
وكل ليلة تنعاد الجره
إللى سعيد ومبسوط
وإللى مقهور بالمره
وعلى دا الحال
كل خميس موال
والستات أشكال وألوان
واحده على حالها بتعدد
وواحده بتغنى وتتبغدد
والدنيا على دا الحال
فقير تكفيه لقمه حاف
بيحمد ربنا وينام
في عز البرد ولا غطا ولا لحاف
وغني معاه الفلوس ماتتعد
لو سأله محتاج ينفخ ويبوز
يحلف بكافة الإيمان الحال عالقد
ياكل ويشرب ويبعزق
ويستخسر اللقمه في الجعان
دنيا غريبه الأطباع
فيها إللى نفسه فى ولد
وفيها إللي نفسه في بنت
وفيها إللى زهقان
من كتر خلفة الأولاد
وفيها إللي بيتمني
ولد أو بنت
مفيش حد راضى عن حاله
الكل بيغنى على مواله
واحد حزين ناصب عزا
وواحد فرحان متهني بالعشا
الكل مشغول بحاله
إللى بيعزى وإللى بيهنى
وإللى ساكت وإللى بيتكلم
دنيا غريبه كل أيامها عجيبه
ولا خميس نافع ولا سبت شافع
المهم النيه والدوافع
إللى بيدور على الخير بيلقاه
وإللى ناوى على الشر
إن شاء الله هيتعلق من قفاه
لو جالك ولد ربيه أحسن تربيه
ياكل ويشرب معاك عالطبليه
وعلمه القناعه من صغره
علمه دروس الحياه وقوله
إللي يلاقيه النهارده
بيمكن بكره مش هيلقاه
لازم يطلع راجل يتحمل المسئوليه
يشيل أسمك من بعدك
ويحسن التربيه
وكله يرجع للأساس
لو الأساس علي أرض عفيه
ترتاح البال وتعيش عيشه هنيه
البنت  بكره هتبقى ست
تاخد إبن الحلال الجد
المهم متستعجلش
تتأنى ومتلخبطش
شورها والمشوره حلال
قبل ما تانسب حاسب
الدنيا قاعده مطارتش
مش أى عريس والسلام
المهم راجل يتحمل المسؤليه
إللى يحافظ على عرضه
وميفرطش
خلى بالك من الكلام المعسول
بكره هتدور عليه مبيحصلش
المهم الكلام المعقول
إللى يدخل الدماغ وميطلعش
وربنا يكفينا شر المهاويس
وشر الحاسد والحاقد
ويكفينا شر عيون الناس
ويجعل كل ليالينا
خميس فى خميس
فرح وسعاده وراحة بال
خاطرتي
زغلول الطواب